Novoizabrani američki predsjednik Donald Tramp u svom inauguracijskom govoru počeo je s Amerikom, pomenuo je Kinu, „pregazio“ je Panamu, a završio na – Marsu.
Međutim, u moru geopolitičkih izazova koje je spomenuo, ima jedno i koje nije – Ukrajinu. Na nju se, naime, u cijelom govoru nije osvrnuo niti najmanjim paragrafom, osim što je generalno najavio da će svijet, pod njim, biti mirniji i stabilniji.
Zapravo ta činjenica je pomalo nevjerovatna s obzirom da je Tramp posljednjih mjeseci neprestano pričao kako će zaustaviti rat u Ukrajini prvi dan po dolasku u Ovalnu kancelariju.
Čini se da je taj plan propao u startu, ali opet ignorisati zemlju u koju je Amerika posljednje tri godine „ulupala“ nevjerovatnih 88 milijardi dolara… Sve skupa, pomalo bizarno, piše Jutarnji list.
Kako god bilo, zanimljivo je da je ruski predsjednik Vladimir Putin poslao čestitku novom američkom predsjedniku i rekao da je Rusija spremna za razgovore sa SAD o ratu u Ukrajini i nuklearnom oružju nakon što je čestitao Donaldu Trampu na predsjedničkoj inauguraciji.
„Čestitam novoizabranom američkom predsjedniku na preuzimanju dužnosti“, rekao je Putin u ponedjeljak u televizijskom prenosu sastanka njegovog Savjeta bezbjednosti uoči inauguracije u Vašingtonu.
„Želim osigurati dugotrajni mir u Ukrajini, a ne kratki prekid vatre. Vidimo izjave novoizabranog predsjednika Sjedinjenih Država i članova njegovog tima o želji da se obnove izravni kontakti s Rusijom. Čujemo i njegovu izjavu o potrebi da se učini sve što je moguće kako bi se spriječio Treći svjetski rat. Naravno, pozdravljamo takav stav i čestitamo izabranom predsjedniku SAD na preuzimanju dužnosti“, izjavio je ruski predsjednik, a prenosi Reuters.
Iz Putinovih izjava može se naslutiti tračak nade o početku popravljanja veza između Vašingtona i Moskve, koje su, zbog rata u Ukrajini, pale na najniži nivo od kubanske raketne krize iz 1962. godine.
Podsjetimo,Tramp je obećao brzo okončanje rata u Ukrajini, ali nije tačno objasnio kako će to učiniti.
Ruski predsjednik i ranije je govorio da je njegova zemlja spremna za razgovore, ali uvijek je isticao kako se „ruski teritorijalni dobici i zahtjevi moraju prihvatiti“, što je ukrajinsko vođstvo odbacilo kao neprihvatljivu kapitulaciju.
„Što se tiče samog rješavanja situacije u Ukrajini, želio bih naglasiti da cilj ne bi trebao biti kratki prekid vatre koji bi omogućio pregrupisanje i ponovno naoružavanje snaga, nego dugotrajno primirje zasnovano na poštivanju legitimnih interesa svih ljudi i svih naroda koji žive u regiji“, rekao je Putin.
Takođe je izjavio da je Moskva spremna razgovarati o kontroli nuklearnog naoružanja.
Inače, ugovor o smanjenju strateškog naoružanja, koji ograničava broj strateških nuklearnih bojevih glava koje SAD i Rusija mogu rasporediti, trebao bi isteći 5. februara 2026. To je posljednji preostali stub kontrole nuklearnog oružja između dviju najvećih svjetskih nuklearnih sila.