Naslovna BIH „Od policije tražio drogu, prijetio da će zaklati sinčića“

„Od policije tražio drogu, prijetio da će zaklati sinčića“

0

ZAVIDOVIĆI – Opštinski sud u Zavidovićima potvrdio je optužnicu koja O.M. tereti da je zaključane u kući držao svog sinčića i suprugu, potom nju poslao da mu kupi drogu, a kada je ona slučaj prijavila policiji i oni došli do kuće, zaprijetio da će bebu zaklati, te od policajaca tražio da mu daju marihuanu.

Ove strahote, sudeći po optužnici, događale su se 24. maja u kući gdje O.M. stanuje sa ženom i dvoje maloljetne djece, uključujući bebu Dž.M.

Bio je, dodaje se, u neuračunljivom stanju usljed duševne bolesti te je držao zatvorenog sina Dž.M. u spavaćoj sobi. Osim toga, ističe se, bio je nasilan prema svojoj supruzi V.M., koju je zaključao u spavaću sobu zajedno s njihovim sinom Dž.M., sve vrijeme držeći u zadnjem džepu pantalona nož.

„Galameći na suprugu i vrijeđajući je, prijetio je da neće izaći iz spavaće sobe i da sebi uzme tutu, da bi je oko 16.30 poslao u grad da mu u banci podigne 700 KM i kupi droge za 50 KM, te ju je izgurao iz kuće“, navedeno je u optužnici, potvrđeno je „Nezavisnim novinama“.

Kako se dodaje, nakon što je ona otišla od kuće, a potom ga telefonom iz grada obavijestila da nije podigla novac i kupila drogu, zaprijetio je da ne dolazi kući, riječima: „Ako dođeš, ubit ću te, nemoj mi dolaziti na oči“.

„Nakon toga ona je otišla do kuće u kojoj stanuju njegovi roditelji i telefonom obavijestila policiju. Kada je policija stigla na mjesto događaja zaključao se na spratu kuće, izašao na terasu držeći u jednoj ruci Dž.M., a u drugoj nož, te zahtijevao da mu supruga uđe u kuću, ali da mu prije toga doveze mercedes pred balkon“, navodi se u optužnici.

Poslije toga je, dodaje se, zaprijetio policajcima da će zaklati sinčića i ubiti sebe ako mu odmah ne izbroje 700 evra i novac stave na mercedes zajedno s pet grama marihuane i da će tada žena moći ući u kuću.

„Sve vrijeme prijetio je da će zaklati dijete ako policajci provale u kuću, a zatim je s terase prema policajcima pobacao sto, stolice, saksije i mobilni telefon, koji je izlomio rukama i lupajući ga o ogradu, prijeteći da će Dž.M. baciti s terase i zahtijevajući da se žena popne na balkon ljestvama, da za to ima tri sekunde ili će u protivnom baciti dijete“, ističe se u optužnici.

Potom je, naglašava se, počeo s odbrojavanjem dok je sina držao isturenog preko ivice terase. Nakon što se supruga popela na zadnju letvu ljestava, slobodnom rukom ju je povukao za kosu i prebacio preko ograde balkona i odmah je više puta bokserima i šakama udario u glavu.

„Poslije toga je njoj dao sina Dž.M. te je ugurao u spavaću sobu. Kada je spustila sinčića u krevetić, s obje ruke ju je bacio na krevet te je spriječio da ustane tako što je svojim koljenom pritiskao njena prsa i tukao je šakama i bokserima po glavi govoreći: ‘Ti ćeš meni dovesti policiju, ja sam tebe poslao po drogu, a ti si mi dovela policiju'“, navodi se u optužnici.

Potom je ženi, dodaje se, naredio da izađe i pokupi stvari koje je pobacao s balkona. Kada je izašla, pošto su se policajci sklonili s gornje strane kuće kako ih ne bi vidio, bos je skočio s balkona.

„Sjeo je u mercedes i velikom brzinom se dao u bijeg u pravcu Olova, a za njim u potjeru su krenuli policajci“, dodaje se u optužnici.

Ni tada se, međutim, drama nije završila. Sudeći prema optužnici, istog dana, oko 20.20, pokušao je spriječiti policajce I.A. i M.M. da ga uhapse, nakon što su ga zaustavili na benzinskoj pumpi.

„Kada su ga namjeravali uhapsiti počeo se odupirati pokušavajući pobjeći s mjesta na kome je pronađen, u čemu ga je spriječio policajac M.M. tako što ga je rukom uhvatio za desnu šaku. Pošto je nastavio s pružanjem otpora odgurujući policajca od sebe, i policajac I.A. rukama ga je uhvatio za rame, ali je O.M. nastavio s još jačom agresivnošću tako što je A.I. uhvatio za uniformu, zbog čega su obojica pali na tlo“, dodaje se u optužnici

Tokom pada, policajac I.A. je lakše povrijeđen, nakon čega su bjegunca tek na tlu uspjeli savladati i uhapsiti. Optužen je O.M i da je držao dva paketića marihuane u najlonskoj foliji, a koje je dobrovoljno predao policajcima.

Terete ga za niz krivičnih djela – otmicu, nasilje u porodici, sprečavanje policije u vršenju dužnosti, te posjednovanje droge.

Pratite nas na našoj Facebook i Instagram stranici i "X" nalogu.

Zapratite nas i na Youtube

BONUS VIDEO: