Ne trebate vi, elito, da budete generatori protesta već mi masa! Vi kolo vodite mi spavamo! To vam i odgovara i jednim i drugim. Tek tako pored nas prolaze ključne stvari a da ne mrdamo prstom. Kao sit tornjak pored stada drijemamo a vukovi uveliko u toru! Ali, ne zavaravajte se, ni jedni ni drugi, sve manje smo siti – postajemo gladni vuk – što na ovcu svoje pravo ima!
Vaš cilj, političari, je vlast. Neka je ko zrno al nek je kruna! Cilj opozicije je rokada na političkom polju! Mase su iste elite se mijenjaju! Krucijalno je pitanje za elitu –šta će, i dali će, od zamjene vlasti dobiti običan čovjek! Šta nudite što vlast nema? Imate li alternativu? Ako je samo cilj dolazak vas elite, na tron, uz pomoć nas – mase – onda se tu ne treba ništa dirati. Ako imate nešto novo – ključno – kažite nam šta je to – povjerovaćemo. Masa je ionako manipulativna. Elita slatkorječiva.
Ali da znamo/te šta su protesti – „odgovor mase na loše poteze elite“, te s tim u vezi, kod nas, protesti često i imaju politički uzrok i pozadinu ali i, reklo bi se, motiv – ako masu pogura grupa onih koji bi da budu elita. Opasnost se baš tu javlja, kad pojedinci involvirani u redove nezadovoljne mase, upravo zloupotrebljavaju tu istu masu zarad ličnog okorištavanja ili u konačnici osvajanja „krupnijeg plijena“ koji se u politici zove – vlast.
I jedni i drugi, i vi vlastodršci i vi opozicionari morate da imate više odgovornosti prema nama – masi! Varate se grdno ako mislite da ćemo uvijek biti glupava masa, da smo krdo a vi kauboji na konju sa lasom! Nemojte nas izazivati da vi sjašite a mi uzjašimo – laso je onda u našim rukama!
I jedni i drugi imate odgovornost, vi iz vlasti više jer ste direktno odgovorna za procese koji se dešavaju u društvu a tiču se običnog čovjeka ali sa druge strane, ništa manju odgovornost nemate ni vi opozicionari koji bi trebali imati zadatak konstruktivne a ne suvoparne kritike! Ponudite rješenje i vratite povjerenje naroda! Nisam političar, nisam partijaš, ali u tome vidim rješenje!
Za dijalog ste i jedni i drugi nesposobni a ta nesposobnost proizvodi nesporazume i na koncu bunt. Ako nema dijalog biće protesta!
I na kraju, sve se sažima u pitanju – jednog iz mase – šta je motiv protesta? Iskrena borba za običnog čovjeka ili manipulativni karakter politike u svrhu postizanja ličnih ili partijskih interesa uz pomoć mase!?
Kad dođe masa do odgovora na to pitanje neće biti potrebe da nas partija diže na bunt! Tad će laso biti u našim rukama – a vama neka je Bog u pomoć!
Piše: sociolog Vladimir Vasić
